لاہور: نگراں وزیر اعلیٰ پنجاب محسن نقوی کا کہنا ہے کہ 9 مئی کو آرمی تنصیبات پر حملے کیے گئے آرمی کورٹ ہی فیصلے کرے گی۔
اے آر وائی نیوز کے مطابق نگراں وزیر اعلیٰ پنجاب محسن نقوی نے جناح ہاؤس کے دورے کے موقع پر میڈیا سے گفتگو کرتے ہوئے کہا کہ جو لوگ شرپسندی میں ملوث تھے انہیں نہیں چھوڑیں گے۔
انہوں نے کہا کہ جو ہوا درست نہیں تھا لیکن انشا اللہ ہم اس صورتحال سے ریکور کریں گے، جس چوک کی بے حرمتی ہوئی انشا اللہ پاکستان کا یادگار چوک بنایا جائے گا۔
محسن نقوی نے کہا کہ کسی بے گناہ کو نہیں پکڑا جائے گا اس کی گارنٹی دیتا ہوں، شرپسندوں نے حساس تنصیبات کو نقصان پہنچایا، کوئی نئی عدالت نہیں بنائی جارہی ہے، آرمی تنصیبات پر حملے ہوئے آرمی کورٹ فیصلے کرے گی۔
نگراں وزیر اعلیٰ پنجاب نے کہا کہ شرپسندی میں ملوث ذمہ داروں سے کوئی رعایت نہیں برتی جائے گی۔
دوسری جانب ترجمان پنجاب حکومت عامر میر کا کہنا ہے کہ نو مئی کے دہشت گرد زمان پارک میں موجود ہیں اگر چوبیس گھنٹے کے اندر ہمارے حوالے نہ کیے گئے تو قانون حرکت میں آئے گا۔
عامر میر نے کہا کہ جلاؤ گھیراؤ کرنے والوں کو زمان پارک سے ہدایات ملتی رہیں، پولیس کو فری ہینڈ دے دیا ہے گولی کا جواب گولی سے دیا جائے گا۔
انہوں نے کہا کہ سمجھ سے بالاتر ہے عدالتیں دہشت گردوں کو ریلیف پیکیج کیوں دے رہی ہیں شاید اس لیے ہی ملٹری کورٹس کا فیصلہ کیا گیا ہے۔