بالی وڈ سے متاثر ہوکر فلمی اسٹائل کی چوری نے پولیس کو چکرا کر رکھ دیا، مالک اور ڈرائیور کو دھمکی دے کر ملزمان نے ایس یو وی چھین لی۔
اترپردیش کے شہر لکھنؤ میں دو ملزمان نے بالی وڈ فلموں کے اسٹائل میں چوری کی، پہلے تو انھوں نے مالک اور ڈرائیور کو ڈرا دھمکا کر اسکارپیو ایس یو وی جیسی مہنگی کار چھینی اور اسے لے کر فرار ہوگئے۔
تاہم اس وقت ان کی مشکلات میں اضافہ ہوگیا جب وہ کار لے کر فرار ہوتے ہوئے حادثے کا شکار ہوگئے لیکن انھوں نے ہمت نہیں ہاری۔
حادثے کے بعد جب آس پاس موجود لوگ وہاں مدد کو پہنچے تو ان کی حیرانی کی انتہا نہ رہی جب انھوں نے دیکھا کہ ایس یو وی میں موجود دونوں اشخاص وہاں کسی اور سے زبردستی بائیک چھینے کی کوشش کرنے لگے۔
دنوں ملزمان نے وہاں ایک موٹرسائیکل سوار سے بائیک ہتھیائی اور فرار ہونے میں کامیاب ہوگئے جبکہ لوگ انھیں کار سے اتر کر بائیک چھینتے دیکھ کر ہکا بکا رہ گئے۔
بھارتی پولیس نے انڈین پینل کوڈ کے سیکش 394 کے تحت ان دونوں چوروں کے خلاف مقدمہ درج کرکے ان کی تلاش شروع کردی ہے۔