کراچی : الیکشن کمیشن کے فیصلے کے بعد ایم کیوایم کے وفاقی وزرا کے استعفے وزیر اعظم کو پیش کیے جانے کا امکان ہے۔
تفصیلات کے مطابق الیکشن کمیشن کے فیصلے پر ایم کیو ایم پاکستان کا شدید ردعمل سامنے آیا،ذرائع ایم کیوایم کا کہنا ہے کہ موجودہ حلقہ بندیوں پر الیکشن لڑنا خود کشی ہوگا۔
ذرائع نے کہا ہے کہ ایم کیوایم کے پاس ایک نہیں کئی آپشن موجود ہیں، تمام آپشن زیرغورہیں، پہلے مرحلے میں ایم کیوایم کے وفاقی وزرا کا استعفے وزیر اعظم کو پیش کیے جانے کا امکان ہے۔
ایم کیوایم کا کہنا ہے کہ ہمارےووٹ کی وجہ سے پیپلزپارٹی کے 10 وفاقی وزیرہیں۔
خیال رہے ایم کیو ایم رابطہ کمیٹی کا ہنگامی اجلاس آج ہوگا، جس میں بلدیاتی انتخابات اور الیکشن کمیشن کے فیصلے سمیت موجودہ صورت حال پرغور کیا جائے گا۔
وفاقی وزرا کے استعفی اسپیکر کو بھجوانے اور وفاقی حکومت سےعلیحدگی سمیت دیگرمعاملات پر حتمی مشاورت ہوگی اور اجلاس کے بعد ایم کیو ایم پاکستان کی جانب سے اہم اعلان متوقع ہے۔
