متحدہ قومی موومنٹ پاکستان کا کہنا ہے کہ حکومت کے سسٹم سے بھی اس بات کی تصدیق ہوگئی ہے کہ حالیہ مردم شماری میں بے ضابطگیاں ہوئی ہیں۔
اے آر وائی نیوز کے مطابق متحدہ قومی موومنٹ پاکستان کی رابطہ کمیٹی کا اجلاس آج شام چار بجے طلب کر لیا گیا ہے ذرائع کا کہنا ہے کہ اجلاس میں مردم شماری کے حوالے سے وزیراعظم، وفاقی وزرا اور ادارہ شماریات حکام سے ہونے والی ملاقاتوں پر رابطہ کمیٹی کے اراکین کو اعتماد میں لیا جائے گا۔
ذرائع کا کہنا ہے کہ اجلاس میں آئندہ کے لائحہ عمل پر رابطہ کمیٹی کو اعتماد میں لیا جائے گا۔ حکومتی، اپوزیشن رہنماؤں کے درمیان مذاکرات پر بھی مشاورت ہوگی اور قیادت دیگر اہم امور پر تبادلہ خیال کرے گی۔
ذرائع کا یہ بھی کہنا ہے کہ مردم شماری پر تحفظات کے حوالے سے وزیراعظم اور وفاقی وزرا سے ملاقاتوں میں ہما ری بات سنی اور تسلیم کی گئی۔ ایم کیو ایم کی جانب سے تمام بے ضابطگیوں کے مکمل شواہد پیش کیے گئے اور حکومت کے سسٹم سے بھی اس کی تصدیق ہوئی کہ بے ضابطگیاں ہوئی ہیں۔
ایم کیو ایم کے مطابق ہم نے کراچی کا مقدمہ بھرپور تیاری کے ساتھ لڑا اور اس میں کامیابی بھی ملی۔ ہماری کوشش ہے کہ کراچی کے ایک ایک فرد کو گنا جائے۔
