کراچی: ایم کیو ایم نے وزیر اعظم شہباز شریف کے نئی مردم شماری پر انتخابات کے بیان کو خوش آئند قرار دے دیا۔
تفصیلات کے مطابق وزیر اعظم شہباز شریف کے نئی مردم شماری کے تحت انتخابات کرانے کے بیان پر ایم کیو ایم قیادت اور وزیر اعظم کے درمیان رابطہ ہوا ہے۔
ذرائع کا کہنا ہے کہ ایم کیو ایم نے وزیر اعظم کے بیان کو خوش آئند قرار دیا، ایم کیو ایم کا کہنا ہے کہ آج دیگر جماعتیں بھی ایم کیو ایم کے مؤقف کی تائید کر رہی ہیں، انتخابات نئی مردم شماری اور اس کے تحت نئی حلقہ بندیوں پر ہونے چاہیئں اور اس مؤقف سے پیچھے نہیں ہٹیں گے۔
ذرائع ایم کیو ایم کے مطابق وزیر اعظم نے آج اراکین پارلیمنٹ کے عشائیے میں ایم کیو ایم کے اہم رہنماؤں کو بھی آنے کی دعوت دی ہے۔
ذرائع نے یہ بھی بتایا کہ ایم کیو ایم نے اگست کی مناسبت سے 4 اگست سے 14 اگست تک عشرہ آزادی منانے کا فیصلہ کر لیا ہے، اس دوران یوم آزادی کی مناسبت سے مکالمے، تقریری مقابلوں سمیت دیگر پروگرامز منعقد کیے جائیں گے۔
