کراچی : ایم کیو ایم پاکستان کے کنوینر ڈاکٹر خالد مقبول صدیقی نے کہا ہے کہ آج کا دن تاریخ انسانی کی عظیم ہجرت کو یاد کرنے کا دن ہے، ہم آج ایک مہذب ثقافت اور تہذیب کی نمائندگی کر رہے ہیں۔
یہ بات انہوں نے نمائش چورنگی پر ایم کیو ایم پاکستان کے زیر اہتمام مہاجر کلچر ڈے کی تقریب سے خطاب کرتے ہوئے کہی۔
انہوں نے کہا کہ ایم کیوایم پاکستان محبت کا پیغام لے کر مہاجر کلچر ڈے منارہی ہے، آج کا دن تاریخ انسانی کی عظیم ہجرت کو یاد کرنے کا دن ہے، ایم کیوایم اگلے سال بھرپور طریقے سے مہاجر کلچر ڈے منائے گی۔
ڈاکٹر خالد مقبول صدیقی نے کہا کہ ہم آج ایک مہذب ثقافت اور تہذیب کی نمائندگی کر رہے ہیں، یہ وہ تہذیب ہے جو برصغیرکے ہزاروں افراد کی تہذیب ہے، پاکستان کا ایک ایک دن اسی تہذیب کے سائے میں گزر رہا ہے۔
ایم کیو ایم کنوینئر کا کہنا تھا کہ ہم آج اپنی تہذیب کی یادتازہ کرنے یہاں جمع ہوئے ہیں، ہم حیدر علی اور ٹیپوسلطان کے وارث ہیں، ہم پاکستان کی قومی تہذیب کی عکاسی کیلئے یہاں آئے ہیں، نہ کسی کو ڈرانا ہے نہ کسی کو جتانا ہے ہم یہاں محبت کا پیغام لے کر آئے ہیں۔
واضح رہے کہ مہاجرکلچرل ڈے کی مناسبت سے ایم کیوایم پاکستان کی جانب سے بھی ریلی کا انعقاد کیا گیا، شہر کے مختلف علاقوں سے کلچر ڈے ریلیاں نمائش چورنگی پہنچیں۔
کراچی: نمائش چورنگی پر تیار کیے گئے پنڈال پر تحریک پاکستان کے سرکردہ رہنماؤں کی تصاویر آویزاں کی گئی ہیں، ایم کیو ایم کے دیگر قائدین بھی اسٹیج پر موجود ہیں جبکہ ریلی میں خواتین، نوجوان اور بزرگ بھی بڑی تعداد میں شریک ہیں۔
