کراچی: مراد علی شاہ نے وزیراعلیٰ سندھ کے عہدے کا حلف اٹھالیا،پی پی رینما مسلسل تیسری بار اس منصب پر فائز ہوگئے۔
گورنر سندھ کامران ٹیسوری نے نومنتخب وزیراعلیٰ سندھ سے ان کے عہدے کا حلف لیا۔ مرادعلی شاہ مسلسل تیسری بار وزیراعلیٰ سندھ بن گئے۔ مرادعلی شاہ نے سندھ کے 25ویں وزیراعلیٰ کا حلف اٹھایا۔
تقریب حلف برداری کی نظامت چیف سیکریٹری فخرعالم نے کی۔ وزیراعلیٰ مرادعلی شاہ نے حلف اٹھانے کے بعد بلاول بھٹو سے ملاقات کی۔
چیئرمین پاکستان پیپلزپارٹی بلاول بھٹو زرداری نے مراد علی شاہ کو وزیراعلیٰ کا حلف اٹھانے پر مبارکباد بھی دی۔
تقریب میں بلاول بھٹو کے علاوہ فریال تالپور، قائم علی شاہ، آغا سراج، سعید غنی، عذرا پیچوہو، امتیاز شیخ اور ڈاکٹرسہراب سرکی بھی موجود تھے۔
نو منتخب اراکین سندھ اسمبلی ناصرشاہ، شرجیل میمن، مکیش چاؤلہ اور آئی جی سندھ نے بھی تقریب میں شرکت کی۔
نگراں وزیراعلیٰ سندھ مقبول باقربھی تقریب میں موجود رہے جبکہ حلف برداری میں سفارتکار، تاجر اور شہر کی اہم شخصیات بھی شریک ہوئیں۔
