مظفرگڑھ: پولیس کی موجودگی میں کچہری گیٹ پر فائرنگ سے 2 افراد جاں بحق ہو گئے، جب کہ فائرنگ کرنے والے بہ آسانی فرار ہو گئے۔
تفصیلات کے مطابق مظفرگڑھ میں کچہری کے مین گیٹ پر کار اور موٹر سائیکل سواروں کی فائرنگ سے 2 افراد جاں بحق ہو گئے، جاں بحق افراد کبیر والا ضلع خانیوال کے رہائشی تھے، جو پیشی پر کچہری آئے تھے۔
جاں بحق محمد حسین کے خلاف گزشتہ سال تھانہ صدر میں قتل کا مقدمہ درج ہوا تھا، لیکن وہ ضمانت پر رہا تھا، پولیس حکام کا کہنا ہے کہ ملزمان کو مبینہ طور پر پرانی دشمنی پر قتل کیا گیا ہے۔
اے آر وائی نیوز کے مطابق موقع واردات پر چھ افراد موجود تھے جن میں سے چار بھاگنے میں کامیاب ہو گئے تاہم دو افراد گولیوں کی زد میں آکر موقع ہی پر جاں بحق ہو گئے۔
جائے وقوعے پر پولیس اہل کار ڈیوٹی پر موجود تھے تاہم انھوں نے واقعے کو روکنے کے لیے کوئی کارروائی نہیں کی، اور قاتل فائرنگ کر کے بہ آسانی فرار بھی ہو گئے۔
