اسلام آباد: قومی اسمبلی نے پنجاب اور خیبر پختونخوا میں عام انتخابات کے لیے فنڈز کی فراہمی سے متعلق بل مسترد کر دیا۔
تفصیلات کے مطابق قومی اسمبلی نے پنجاب اور خیبر پختون خوا اسمبلی کے الیکشن اخراجات کی تحریک کثرت رائے سے مسترد کر دی، تحریک مسترد ہونے کے بعد بل کی منظوری کی اجازت نہ ملنے کے باعث الیکشن اخراجات کا بل بھی مسترد کر دیا گیا۔
قومی اسمبلی کی کمیٹی برائے خزانہ اور سینیٹ کی قائمہ کمیٹی برائے خزانہ پہلے ہی اس بل کو مسترد کر چکی ہیں۔
اسپیکر قومی اسمبلی راجہ پرویز اشرف کی زیر صدارت اجلاس تحریک وزیر خزانہ اسحاق ڈار نے پیش کی تھی۔
قومی کے بعد سینیٹ کی قائمہ کمیٹی کا بھی الیکشن کمیشن کو فنڈ دینے سے انکار، بل مسترد
قومی اسمبلی اجلاس میں فنڈز کے اجرا سے متعلق قائمہ کمیٹی کی رپورٹ پیش کی گئی، جس میں بل مسترد کیا گیا تھا۔ وزیر خزانہ نے ایوان میں بل پیش کرنے کی تحریک پیش کی تو قائمہ کمیٹی کی رپورٹ کی روشنی میں بل کی تحریک کثرت رائے سے مسترد کر دی گئی۔
وزیر خزانہ اسحاق ڈار کا کہنا تھا کہ کنسولیڈیٹڈ فنڈ سے پنجاب، کے پی انتخابات کے لیے 21 ارب روپے کی فراہمی کا بل قائمہ کمیٹی نے مسترد کر دیا ہے۔ وزیر قانون کا کہنا تھا کہ تحریک کو مسترد کرنے کے بعد بل کی شق وار منظوری یا مسترد کرنے کے لیے پیش کرنے کی ضرورت نہیں رہی۔
