لاہور : نگراں وزیراعلی پنجاب کیلئے نام سامنے آگئے ، جن میں سابق سینئربیوروکریٹ ناصرکھوسہ ، نصیر احمد خان اور سینئر بیورو کریٹ احمد نواز سکھیرا شامل ہیں۔
تفصیلات کے مطابق پی ٹی آئی اور مسلم لیگ ق کے درمیان نگراں وزیراعلیٰ پنجاب کیلئے 3 ناموں پراتفاق ہوگیا۔
ناموں میں سابق سینئربیوروکریٹ ناصرکھوسہ ، نصیر احمد خان اور سینئر بیورو کریٹ احمد نواز سکھیرا شامل ہیں۔
ذرائع نے بتایا کہ سابق سینئربیوروکریٹ ناصرکھوسہ سال 2018میں سروس ریٹائر ڈہوئے تھے ، ناصر کھوسہ سابق چیف جسٹس پاکستان جسٹس(ر)آصف کھوسہ کے بھائی ہیں۔
ذرائع کے مطابق نصیراحمدخان سال2002کےدوران وفاقی وزیررہے، یہ چوہدری خاندان کے قریبی رفقا میں شمار ہوتے ہیں۔
ذرائع کا کہنا تھا کہ سینئربیوروکریٹ احمدنوازسکھیرا اس وقت وفاقی سیکرٹری ہیں ، احمد نواز سکھیرا رواں ماہ کے آخر میں ریٹائرڈ ہوں گے۔
گذشتہ روز سابق وزیر اعلیٰ پنجاب پرویز الٰہی نے میڈیا سے گفتگو کرتے ہوئے کہا تھا کہ چیئرمین تحریک انصاف عمران خان کے ساتھ ملاقات میں نگراں وزیر اعلیٰ پنجاب کے لیے تین نام فائنل کر لیے، کل میٹنگ رکھی ہے جس میں مزید مشاورت کی جائے گی۔
پرویز الٰہی کا کہنا تھا کہ اپوزیشن کے ساتھ 3 ناموں میں سے ایک پر اتفاق ہو سکتا ہے، اپوزیشن کھلے دل کے ساتھ سوچیں تو تینوں نام موزوں ہیں، مسلم لیگ (ن) کا رونا دھونا چل رہا ہے اور وزیر اعظم شہباز شریف کو نیند نہیں آئے گی، ان کی شکلیں دیکھ لیں پریشان بھاگے بھاگے گھوم رہے ہیں۔
