اسلام آباد : وفاقی وزیر داخلہ رانا ثنا اللہ کا کہنا ہے کہ نگراں وزیراعظم کے لیے نام شارٹ لسٹ ہوگئے ہیں، شارٹ لسٹ ناموں میں حفیظ شیخ کا نام بھی شامل ہیں۔
تفصیلات کے مطابق وزیرداخلہ رانا ثنااللہ نے نجی ٹی وی چینل کے پروگرام میں گفتگو کرتے ہوئے کہا کہ نگراں وزیراعظم کے لئے نام شارٹ لسٹ ہوگئے ہیں، منگل یا بدھ تک نگران وزیراعظم کے نام کا فیصلہ ہوجائےگا۔
رانا ثنااللہ کا کہنا تھا کہ ٹیکنوکریٹ یا ماہر معیشت بھی نگراں وزیراعظم ہوسکتا ہے، شارٹ لسٹ ہونے والوں میں عبدالحفیظ شیخ اور سپریم کورٹ کے ایک ریٹائرڈ جج کا نام شامل ہے تاہم شاہد خاقان اور اسحاق ڈار کے نام شارٹ لسٹ میں شامل نہیں۔
انتخابات کے حوالے سے انھوں نے کہا کہ عام انتخابات میں تاخیر ہوجائے تو کیا ہو جائے گا، حلقہ بندیاں نو دسمبر تک ہوجانی چاہئیں، اس کے بعد الیکشن فروری یا مارچ میں ہوں تو کوئی مسئلہ نہیں ہوگا۔
نئی مردم شماری کے سوال پر وزیر داخلہ کا کہنا تھا کہ نئی مردم شماری اتفاق رائے سےمنظور ہوئی ہے، اگرالیکشن90دن کی بجائے120دن میں ہوجائیں گے تو کیاہوجائےگا، آئین تو یہ بھی کہتاہے کہ 2017کی مردم شماری پردوسرا الیکشن نہیں ہوسکتا، 2017 کی مردم شماری پر اعتراضات تھے۔
چیئرمین پی ٹی آئی کی گرفتاری پر رانا ثنااللہ نے کہا کہ اب رونا کس بات کا،چیئرمین پی ٹی آئی مکافات عمل کاشکارہوئے، جیل میں قانون کے مطابق تمام سہولتیں دینےکی ہدایت کی ہے۔
ان کا مزید کہنا تھا کہ چیئرمین پی ٹی آئی نے نوجوانوں کو گمراہ کیا، 4سال قوم کوتقسیم کرنےکے سوا کچھ نہ کیا، 9مئی واقعےکےذمہ داروں کوسخت سزاملنی چاہیے۔
