اسلام آباد : کے الیکٹرک صارفین کیلئے بجلی 4 روپے 49 پیسے تک مہنگی کردی گئی ، اضافی ایڈجسٹمنٹ جنوری سے اپریل 2023 تک 4 ماہ میں وصول کی جائیں گی۔

تفصیلات کے مطابق کراچی کے بجلی صارفین کیلئے بری خبر آگئی، نیپرا نے کے الیکٹرک صارفین کیلئے بجلی 4روپے 49 پیسے تک مہنگی کرنے کی منظوری دے دی۔

نیپرا کا کہنا ہے کہ مختلف کیٹیگریز کیلئے قیمتوں میں اضافہ ایک روپے 49 پیسےسے 4 روپے 49 پیسے تک ہوگا۔

یکساں ٹیرف کے حوالے سے وفاقی حکومت کی درخواست پر نیپرا نے فیصلہ جاری کردیا۔

نیپرا نے کہا ہے کہ نیپرا اتھارٹی نے27 دسمبرکو وفاقی حکومت کی درخواست پرسماعت کی تھی، ایڈجسٹمنٹ اکتوبر، نومبر ، دسمبر 2022 اور جنوری 2023 میں استعمال ہوئیں۔

فیصلے میں کہا گیا کہ اضافی ایڈجسٹمنٹ جنوری سے اپریل 2023 تک 4 ماہ میں وصول کی جائیں گی۔

یاد رہے وفاقی حکومت نے ڈسکوز ، کے الیکٹرک کے یکساں ٹیرف کیلئے درخواست دائر کی تھی۔