ابو ظہبی: متحدہ عرب امارات کی ایئر لائن فلائی دبئی کا کہنا ہے کہ ایک سال کے دوران ایئر لائن میں 12 سو نئے ملازمین بھرتی کیے گئے ہیں، سال رواں بھی نئے ملازم رکھے جائیں گے۔
اردو نیوز کے مطابق فلائی دبئی کا کہنا ہے کہ گزشتہ سال 2022 کے دوران مختلف شعبوں میں 1200 نئے ملازم تعینات کیے ہیں، ملازمین کی مجموعی تعداد 4 ہزار 600 سے زیادہ ہوچکی ہے۔
فلائی دبئی کا کہنا ہے کہ سال رواں 2023 کے دوران بھی نئے ملازم تعینات کیے جائیں گے، کمپنی اپنا کاروبار بڑھا رہی ہے جبکہ 21 نئے طیارے بھی فلیٹ میں شامل کیے گئے ہیں۔
فلائی دبئی کے مطابق دسمبر 2022 کے آخر میں اس کے طیاروں کی تعداد 71 تک پہنچ چکی ہے، 115 سے زیادہ ایئر پورٹس کے لیے پروازیں چلائی جا رہی ہیں۔
ان میں افریقہ، وسطی ایشیا، قوقاز، مشرقی و جنوبی و وسطی یورپ، جی سی سی ممالک، مشرق وسطیٰ، پاکستان، انڈیا اور بنگلہ دیش کے 53 شہر شامل ہیں۔
فلائی دبئی کا کہنا ہے کہ سنہ 2029 تک 154 میکس طیارے اس کے فلیٹ میں شامل ہوجائیں گے۔
