آکلینڈ: نیوزی لینڈ میں شدید ترین بارشوں اور بدترین سیلاب نے تباہی مچا دی ہے۔
تفصیلات کے مطابق نیوزی لینڈ میں شدید بارشوں کے بعد سیلاب نے کئی علاقوں کو گھیر لیا ہے، جس کے نتیجے میں 4 افراد ہلاک ہو گئے ہیں۔
جمعہ سے بارش کی وجہ سے تباہ حال نیوزی لینڈ کا 1.6 ملین آبادی کا سب سے بڑا شہر آکلینڈ اتوار کو ہنگامی حالت میں رہا، ساڑھے تین سو خاندانوں کو نقل مکانی کرنی پڑی۔
آکلیند میں ہنگامی صورت حال تاحال برقرار ہے، آکلینڈ ہوائی اڈے پر فلائٹ آپریشن بھی معطل ہو گیا ہے، اور شہر کے ہزاروں افراد بجلی سے محروم ہیں۔
نقصانات کے تخمینے کے مطابق 151 املاک پانی کی نذر ہو گئی ہیں، انتظامیہ کا کہنا ہے کہ سیلاب ا ور بارشوں کے نتیجے میں مختلف علاقوں میں تباہ شدہ ملبے کو ہٹانے کے لیے 63 ملین ڈالر لاگت آئے گی۔
ملک کے موسم کی پیشن گوئی کرنے والے ادارے ’میٹ سروس‘ نے شمالی جزیرے کے لیے آج پیر کو مزید شدید موسم کی وارننگ دی ہے، ادارے کے مطابق شدید بارش اچانک سیلاب کا سبب بن سکتی ہے۔
