حیدرآباد: بھارتی ریاست تلنگانہ کے ایک علاقے میں جھاڑیوں سے نوزائیدہ بچی ملی ہے، جس کے رونے کی آواز سن کر لوگ اس کی طرف متوجہ ہوئے۔
بھارتی میڈیا کے مطابق ریاست تلنگانہ کے سنگاریڈی ضلع کے رکُماپور گاؤں کے نواح کی جھاڑیوں میں ایک نوزائیدہ لڑکی پائی گئی، مقامی افراد کا کہنا تھا کہ اس علاقے میں نوزائیدہ کے رونے کی آواز سن کر انھوں نے اسے تلاش کیا۔
رپورٹس کے مطابق یہ واقعہ منگل کی صبح پیش آیا، لڑکی ملنے پر مقامی افراد نے فوری طورپر پولیس اور محکمہ صحت کے ذمہ داروں کو مطلع کر دیا۔
محکمہ پولیس کے مطابق جھاڑیوں سے برآمد ہونے والی نوزائیدہ بچی کو طبی امداد کے لیے فوری طور پر علاقے کے اسپتال ظہیر آباد منتقل کیا گیا۔
پولیس کا کہنا تھا کہ بچی ملنے کے واقعے کا کیس درج کر لیا گیا ہے، اور اس کی چھان بین ہو رہی ہے کہ آیا بچی کو جھاڑیوں میں کون چھوڑ کر گیا تھا۔