دوحہ: فیفا ورلڈ کپ 2022 کے کوارٹر فائنل میں کروشیا سے اپ سیٹ شکست پر عالمی شہرت یافتہ اسٹار فٹبالر نیمار نفسیاتی طور پر متاثر ہوگئے۔
غیر ملکی میڈیا کے مطابق نیمار نے انسٹا گرام پر اپنی دو تصاویر شیئر کیں جن میں وہ میچ ہارنے کے بعد مایوس دکھائی دے رہے ہیں۔
نیمار نے تصاویر کے ساتھ طویل کیپشن میں لکھا کہ شکست سے میں نفسیاتی طور پر تباہ ہوگیا، یہ وہ شکست تھی جس نے مجھے سب سے زیادہ نقصان پہنچایا۔
اسٹار فٹبالر نے لکھا: ’میں گراؤنڈ میں 10 منٹ تک بالکل مفلوج ہو کر رہ گیا تھا اور پھر جذبات پر قابو نہ رکھ سکا۔ بدقسمتی سے یہ ایک طویل وقت کے لیے تکلیف ہے۔ مجھے اپنی ٹیم پر فخر ہے کیوں کہ ان میں عزم اور لگن کی کمی نہیں تھی۔‘
یہ بھی پڑھیں: کیا نیمار اگلا فیفا ورلڈ کپ کھیلیں گے؟ فٹبالر نے خاموشی توڑ دی
View this post on Instagram
انسٹا گرام پوسٹ میں نیمار نے اپنے شائقین کا بھی شکریہ ادا کیا جنہوں نے انہیں بھرپور سپورٹ کیا اور شکست پر مایوس ہوئے۔
یاد رہے کہ کوارٹر فائنل میں برازیل اور کروشیا کے درمیان دلچسپ اور سنسنی خیز مقابلہ دیکھنے کو ملا۔ ٹیموں نے متعدد بار ایک دوسرے کے گول پوسٹ پر حملے کیے تاہم کسی ٹیم کو کامیابی نہ مل سکی۔
مقررہ وقت میں دونوں ٹیموں کا مقابلہ بغیر کسی گول کے برابر تھا لیکن اضافی وقت میں دونوں نے ایک ایک گول کیا جس کے بعد فیصلہ پیلنٹی ککس پر ہوا۔
کروشیا نے پنالٹی شوٹ آؤٹ پر 2-4 سے کامیابی حاصل کی اور یوں کروشیا مسلسل دوسری بار فیفا ورلڈ کپ کے سیمی فائنل میں جا پہنچی۔
میچ کے بعد نیمار کے گراؤنڈ میں زارو قطار رونے کی ویڈیو سوشل میڈیا پر وائرل ہوئی تھی۔ ساتھی کھلاڑیوں کی تسلی کے باوجود بھی وہ کافی دیر روئے تھے۔
Million heart brokes neymar crying 💔💔 #FIFAWorldCup #Neymar pic.twitter.com/ENHlraFJJG
— Henry 🇧🇩 (@shoaibA21211051) December 9, 2022