کراچی: میٹرک کے سالانہ امتحانات کے آغاز میں چار دن باقی رہ گئے اور بیشتر نجی اسکولوں کے طلبا تاحال ایڈمٹ کارڈ سے محروم ہیں۔
تفصیلات کے مطابق کراچی میں میٹرک کے سالانہ امتحانات کا آغاز8مئی 2023سے ہورہا ہے ، امتحانات میں ساڑھے3لاکھ سے زائد طلباو طالبات شرکت کریں گے۔
میٹرک بورڈ کی جانب سے ایڈمٹ کارڈ تمام سرکاری و نجی اسکولوں کو پہلے ہی فراہم کئے جاچکے تاہم متعدد اسکولوں نے ایڈمٹ کارڈ طالبعلموں کو فراہم نہیں کئے گئے۔
سرکاری اسکولوں کی جانب سے ایڈمٹ کارڈ کی تقسیم کا مرحلہ مکمل کیا جاچکا ہے جبکہ متعدد نجی اسکولوں نے سالانہ چارجز کے نام پر ایڈمٹ کارڈ روکے ہوئے ہیں۔
ذرائع میٹرک بورڈ نے بتایا کہ ایڈمٹ کارڈ کا اجرا فیس کی بقایاجات کی ادائیگی سے مشروط کردیا گیا، ایڈمٹ کارڈ کا اجرا آن لائن کیا جارہا ہے، جس کے لئے تمام اسکولوں کو آن لائن آئی ڈی اور پاس ورڈ فراہم کئے جاچکے ہیں۔
ترجمان کا کہنا تھا کہ اسکولوں کی ذمہ داری ہے کہ وہ ایڈ مٹ کارڈ ڈاؤن لوڈپرنٹ طالبعلموں کو فراہم کریں، سہولت کیلئے پہلی مرتبہ یہ اقدام اٹھایا گیا ہے، طلبا کو بلا جواز پریشان کرنے سے گریز کیا جائے۔
