شمالی کوریا کی جانب سے یوکرین کے خلاف جنگ کیلئے روس کو مجوزہ اسلحے کی فراہمی پر امریکا نے شمالی کوریا کو سنگین نتائج کی دھمکی دے دی۔
تفصیلات کے مطابق امریکا کے سخت حریف شمالی کوریا کے حکمران کم جونگ اور روسی صدر پیوٹن کی متوقع ملاقات اور جنگی اسلحہ کی ترسیل کے حوالے سے ہونے والی بات چیت پر امریکا نے شدید ردعمل کا اظہار کیا ہے۔
غیر ملکی خبر رساں ادارے کی رپورٹ کے مطابق اس حوالے سے وائٹ ہاؤس کے ایک اعلیٰ عہدیدار نے خبردار کیا ہے کہ اگر شمالی کوریا نے روس کو یوکرین کے خلاف جنگ لڑنے کے لیے ہتھیار مہیّا کیے تو اسے سنگین نتائج کا سامنا کرنا پڑے گا۔
امریکی صدر جوبائیڈن کے قومی سلامتی کے مشیر جیک سلیوان نے نامہ نگاروں کو بتایا کہ اس عمل سے وہ (شمالی کوریا اور روس) بین الاقوامی برادری میں اس کی قیمت ادا کریں گے۔
واضح رہے کہ نیویارک ٹائمز نے ایک رپورٹ میں کہا ہے کہ کم جونگ اور پیوٹن کی ہونے والی ممکنہ ملاقات میں دونوں رہنما روس کو آرٹلری گولے اور اینٹی ٹینک میزائل بھیجنے پر تبادلہ خیال کریں گے جس کے بدلے ماسکو کی جدید ٹیکنالوجی مصنوعی سیاروں اور ایٹمی طاقت سے چلنے والی آبدوزوں پر بات چیت ہوگی۔
