سینیٹ میں ایم کیو ایم کے قائد الطاف حسین سے متعلق ریمارکس پر پیپلز پارٹی اور ایم کیو ایم کے ارکان میں سخت الفاظ کا تبادلہ ہوا، جس کے بعد ایم کیو ایم کے ارکان واک آؤٹ کرگئے، اجلاس بدھ کی شام تک ملتوی کردیا گیا۔

سینیٹ اجلاس میں الطاف حسین سے متعلق ریمارکس پر ایم کیو ایم اور پیپلز پارٹی کے ارکان میں جھڑپ نے ماحول گرما دیا، پیپلزپارٹی کے کریم خواجہ کا کہنا تھا کہ برطانوی حکومت بیان کا نوٹس لے اور کاروائی کرے، جس پرمتحدہ قومی موومنٹ کے عبدالحسیب اور دیگر ارکان نے شدید احتجاج کیا اورایوان سے باہرچلے گئے۔

غداری کیس پر بات کرتے ہوئے ن لیگ کے مشاہد اللہ خان کا کہنا تھا کہ آمر کی حمایت نہ کی جائے، حکومت نے فرض پورا کیا اور معاملہ عدالت میں ہے، اسپتال میں زیرعلاج مشرف پراپرٹی ڈیلنگ کررہے ہیں۔

ملک میں امن وامان کی صورتحال پرفرحت اللہ بابرکا کہنا تھا کہ پاک افغان کراس بارڈرعسکریت پسندی کا مسئلہ حل کرنا ہوگا، لاپتہ افراد کے حوالے سے سیکیورٹی اداروں کو پارلیمنٹ کے ماتحت لایا جائے، غیرقانونی اقدام پراحتساب ہونا چاہیے۔
   

وزارت آئی ٹی کے ماتحت اداروں پاکستان کمپیوٹر بورڈ اور ای جی ڈی کے تحت چلنے والے تیرہ منصوبوں میں مالی بے ضابطگیوں کا انکشاف ہوا ہے، وزیر مملکت برائے آئی ٹی انوشہ رحمان نے معاملہ نیب کے حوالے کرنے کے احکامات جاری کردیئے۔

وزیرمملکت برائے آئی ٹی نے گذشتہ برس ستمبر میں پاکستان کمپیوٹر بورڈ اور ای جی ڈی کے انٹرنل آڈٹ کے احکامات جاری کیے تھے جس کے نتیجے میں تیرہ منصوبوں میں شدید مالی بے ضابطگیاں پائی گئیں۔

ان منصوبوں کے تحت سی ڈی اے، وزارت داخلہ، اسٹیبلشمنٹ ڈویژن ، ایف آئی اے اور اسلام آباد پولیس سمیت دیگر اداروں کو ای سروسز فراہم کی جانا تھیں۔ وزیرمملکت برائے آئی ٹی انوشہ رحمان کا کہنا ہے کہ کرپٹ عناصر کے لیے وزارت کے لیے کوئی جگہ نہیں۔ آئی ٹی کے تمام منصوبوں کو شفاف بنایا جائے گا۔

بھارتی ہائی کمشنر ٹی سی اے راگھوان نے کہا ہے کہ سابق صدر پرویز مشرف کا ٹرائل پاکستان کا اندرونی معاملہ ہے ، وزیر اعظم منموہن سنگھ کی خواہش ہے کہ وہ اپنی مدت ختم ہونے سے پہلے پاکستان کا دورہ کریں۔

ایوان صنعت و تجارت لاہور میں تقریب سے خطاب اور میڈیا سے گفتگو کرتے ہوئے بھارتی ہائی کمشنر کا کہنا تھا کہ پاکستان مخالفت کی بناء پر بھارت میں انتخابی مہم نہیں چلائی جا رہی، بہت سارے ایشوزکو انتخابی مہم کا حصہ بنایا گیا ہے۔

بھارتی وزیر اعظم منموہن سنگھ کی خواہش ہے کہ وہ اپنی مدت ختم ہونے سے پہلے پاکستان کا دورہ کریں، سابق صدر پرویز مشرف کا ٹرائل پاکستان کا اندرونی معاملہ ہے، انہوں نے کہا کہ بھارت نے یورپی یونین کی جانب سے پاکستان کو جی ایس پی پلس سٹیٹس ملنے کی مخالفت نہیں کی۔