پشاور : خیبر پختونخوا کے دارلحکومت پشاور میں بچوں کی تفریح کیلئے پاک فوج کی جانب سے ‘ویلی گاڑی’ کا انتظام کیا گیا ، ‘ویلی گاڑی’ سڑکوں پر چلتی پھرتی موبائل لائبریری اور انفوانٹرٹینمنٹ کی دنیا کا ایک انوکھا شاہکار ہے۔
تفصیلات کے مطابق خیبر پختونخوا میں پاک فوج کا بچوں کی تخلیقی صلاحیتیں نکھارنے کیلئے اہم قدم سامنے آیا، پشاور میں بچوں کی تفریح کیلئے پاک فوج کی جانب سے ویلی گاڑی کا انتظام کیا گیا۔
"ویلی” گاڑی سڑکوں پر چلتی پھرتی موبائل لائبریری اور انفوانٹرٹینمنٹ کی دنیا کا ایک انوکھا شاہکارہے، ویلی میں بچوں کیلئے کہانیوں کی کتابیں ،کھلونے،مختلف گیمز اورویڈیو گمیزسسٹم سمیت فلمزسسٹم بھی لگایا گیا ہے۔
ویلی کی آمد سے پشاور کے گلی کوچوں میں اس کی دھوم مچ گئی، ہر عمرکے بچوں نے ویلی میں خصوصی دلچسپی کا اظہار کیا ہے، بچوں نے پاکستان آرمی اور پاکستان زندہ باد کےنعرے بھی لگائے۔
بچوں کے جذبہ حب الوطنی نے بڑوں کے دل موہ لئے ، بچوں نے بتایا آج ہم نے بہت سارے گیمز کھیلے اور مزے مزے کی کہانیاں پڑھی ہیں، ویلی کی ہمارے محلےمیں آمد سے ہم سب بہت خوش ہیں، گیمز، کتابیں اور فلمیں ایک ہی چھت کے نیچے ہونے سے ہمیں بہت مزہ آیا، بچوں نے پاکستان آرمی کا شکریہ بھی ادا کیا۔
