اسلام آباد: ترجمان وزارت مذہبی امور کا کہنا ہے کہ آج ایک ہزار 50 پاکستانی عازمین حج براستہ جدہ ایئرپورٹ مکہ مکرمہ پہنچیں گے۔
ترجمان وزارت مذہبی امور کے مطابق حج ٹرمینل جدہ کے ذریعے پاکستانی عازمین حج آج مکہ مکرمہ پہنچیں گے، حج ٹرمینل جدہ کے ذریعے سرکاری عازمین کی حج پروازوں کا آغاز ہوگیا ہے۔
ترجمان نے بتایا کہ 340 عازمین کو لیکر سعودی ایئر لائن کی پرواز جدہ ایئرپورٹ پہنچ گئی، ڈی جی حج، قونصل جنرل جدہ، ڈائریکٹر حج مکہ، انچارج جدہ ایئرپورٹ نے عازمین کا استقبال کیا۔
ترجمان نے بتایا کہ روٹ مکہ کے تحت اسلام آباد سے آنے والے عازمین کو 8 بسوں سے مکہ روانہ کیا گیا، 5 جون کو اسلام آباد اور ملتان سے مزید ایک، ایک پرواز جدہ حج ٹرمینل پہنچے گی۔
ترجمان مذہبی امور کا بتانا ہے کہ آج ایک ہزار 50 پاکستانی عازمین حج براستہ جدہ ایئرپورٹ مکہ مکرمہ پہنچیں گے، 6جون کو 11 پروازوں سے مزید 3387 پاکستانی عازمین حج جدہ پہنچ جائیں گے۔
