کراچی: پاک سوزوکی موٹرز نے 2 سے 6 جنوری تک پلانٹ بند کرنے کا اعلان کر دیا ہے۔
تفصیلات کے مطابق پاک سوزوکی موٹرز کمپنی نے پاکستان اسٹاک ایکسچینج کو ایک خط لکھ کر مطلع کیا ہے کہ 2 سے 6 جنوری تک ان کی کارسازی اور موٹر سائیکل کی پروڈکشن مکمل طور پر بند رہے گی۔
پاک سوزوکی موٹرز کے مطابق آٹو پارٹس اور سی کے ڈی کٹس کی امپورٹ پر مشروط اجازت نامے کی وجہ سے یہ فیصلہ کیا گیا ہے، کمپنی کا مؤقف ہے کہ اسٹیٹ بینک آف پاکستان کی پابندیوں کی وجہ سے سپلائی چین متاثر ہو رہی ہے۔
- Advertisement -
کمپنی اعلامیے کے مطابق مشروط اجازت نامے کے باعث کمپنی کی درآمدی کنسائنمنٹ کی کلیئرنس بری طرح متاثر ہو رہی ہے، جس کے نتیجے میں کمپنی کی انوینٹری شدید متاثر ہوئی ہے، واضح رہے کہ انڈس موٹرز کا کاریں تیار کرنے والا پلانٹ پہلے ہی 30 دسمبر تک بند ہے۔
