عالمی کپ میں پاکستان کرکٹ ٹیم کی اب تک جس طرح کی پرفارمنس رہی ہے اس پر بہت سارے سوالات اٹھ رہے ہیں، اب ٹیم میں اختلافات کی خبریں بھی سامنے آنے لگی ہیں۔
اے آر وائی نیوز کے اسپورٹس پروگرام میں قومی کرکٹ ٹیم کی کارکردگی پر اظہار خیال کرتے ہوئے شعیب جٹ کا کہنا تھا کہ آپ مانیں نہ مانیں آپ ون یونٹ نہیں ہیں جب آپ ون یونٹ نہیں ہونگے تو پھر آپ کیسے پرفارم کریں گے۔
انھوں نے کہا کہ کل کپتان نے جو بات کی ہے اگر اسے سمجھیں تو بڑی خوفناک بات کی ہے، وہ کپتان ہے پریس کانفرنس میں تو آکر نہیں بتائے گا کہ کیا بات چل رہی ہے۔ اب ڈھکے چھپے الفاظ میں بات باہر آنا شرو ہورہی ہے۔
شعیب نے کہا کہ سچ بڑا کڑوا ہے، ہمارے تمام لیجنڈز ٹیم کی حوصلہ افزائی کررہے ہیں بڑی اچھی بات ہے لیکن پاکستان ٹیم کے ساتھ ماہر نفسیات بھی ہے جو انھیں جوش دلاتا ہے مگر کچھ اچھا نہیں ہورہا ایسا اس لیے نہیں ہورہا کہ آپ ون یونٹ نہیں ہیں۔
ہم مثال دیتے ہیں کہ نیدرلینڈز بڑا اچھا کھیل رہی تھی اس نے جنوبی افریقہ کو شکست دی تھی، مگر افغانستان کی بھی مثال لے لیں وہ ون یونٹ ہے۔
پروگرام میں مزید ان کا کہنا تھا کہ ہوسکتا ہے کہ میں غلط بیانی کررہا ہوں مگر جو چیزیں باہر آرہی ہیں وہ آپ دیکھ لیں، کپتان کیا کہہ رہے ہیں اگر ایک کھلاڑی جو پروفیشنل ہے اس کا فوکس آنے والی گیند پر نہیں ہے کہیں اور ہے تو وہ کہیں اور کیا ہے۔
سب کے دماغ منتشر ہیں، اگر اتحاد نہیں ہو گا تو آپ کیسے جیتیں گے۔ آنے والے چار میچز میری بھی خواہش ہے کہ جیتیں لیکن مجھے لگتا ہے کہ آپ اس میں سے ایک میچ بھی جیت جائیں تو بہت بڑی بات ہوگی۔
شعیب جٹ نے کہا کہ کڑوا سچ اس لیے بول رہا ہوں کہ جیتنے کے لیے متحد ہونا بہت ضروری ہے، بابر اعظم کے میچ کے بعد دیے جانے والے بیان سے مجھے تو سب ٹھیک نہیں لگ رہا۔
