پیرس: یونیسکو میں پاکستان کو دو سال کے لیے ایگزیکٹو بورڈ کا وائس چیئرمین منتخب کر لیا گیا۔
وزارت خارجہ کے مطابق پاکستان کو ایشیا پیسیفک گروپ کی جانب سے 2023-2025 کی مدت کے لیے یونیسکو کے ایگزیکٹو بورڈ کے وائس چیئر کے طور پر بھاری حمایت کے ساتھ منتخب کیا گیا ہے۔
پیرس میں ہونے والے ایگزیکٹو بورڈ کے اجلاس میں 58 رکنی ایگزیکٹو بورڈ میں سے پاکستان کو 38 جب کہ بھارت کو 18 ووٹ ملے۔
وزارت خارجہ نے کہا کہ پاکستان ایگزیکٹو بورڈ کے ممبران اور یونیسکو کے تمام ممبر ممالک کا ان کی زبردست حمایت کے لیے شکر گزار ہے، پاکستان اپنی ذمہ داریاں عزم، ساکھ، دیانت دارانہ بات چیت اور باہمی احترام کے گہرے احساس کے ساتھ نبھائے گا۔
وزارت خارجہ نے مزید کہا ہے کہ پاکستان مشترکہ اقدار اور اقوام متحدہ کے چارٹر کے مقاصد اور اصولوں کے دفاع کے لیے تمام رکن ممالک کے ساتھ مل کر کام کرتا رہے گا، اور یونیسکو میں مشترکہ مقاصد کو فروغ دینے کے لیے اجتماعی کوششیں بروئے کار لائے گا۔
