انسانی اسمگلروں کے ذریعے پاکستانیوں کا ملک سے باہر جانا خطرناک تو تھا ہی مگر اب ویزے پر تعلیم حاصل کرنے والے طلبہ کو روشن مستقبل کا جھانسہ دے کر ترکیہ میں اغواء کرکے ان سے تاوان وصول کرنے کے گروہ کا انکشاف ہوا ہے۔
ایسا ہی واقعہ پاکستانی طالب علم نعمان الطاف کے ساتھ پیش آیا ہے۔ 17سالہ نعمان الطاف خانیوال کا رہائشی ترکیہ میں زیر تعلیم ہے جسے ترکیہ میں موجود ایک گروہ نے یورپ، یونان منتقلی کا جھانسہ دیکر اغواء کرلیا، گھر والوں سے بھاری رقم وصول کی۔
یہ کہانی صرف نعمان الطاف کی ہی نہیں ہے بلکہ ترکیہ میں تعلیم حاصل کرنے والے 8دیگر پاکستانی طلبہ کو بھی اسی طرح جھانسہ دیکر اغواء کرنے کے بعد تشدد کا نشانہ بنایا جارہا ہے ان کی ویڈیو تاوان کیلئے ان کے اہل خانہ کو بھی بھیجی گئی ہے۔
پاکستانی حکام نے ترکیہ میں تعلیم حاصل کرنے والے طلبہ سے اپیل کی ہے کہ وہ قانون کے مطابق اپنی تعلیم مکمل کریں اس دوران کسی گروہ کی باتوں میں آکر اپنی زندگی اور مستقبل خراب نہ کریں۔
