نیویارک : فلسطینی سفیر نے اقوام متحدہ کی جنرل اسمبلی میں غزہ جنگ بندی سے متعلق قرارداد کی منظوری پر پاکستان کو خراج تحسین پیش کیا اور کہا پاکستان نے ہماری بہترین وکالت کی۔
تفصیلات کے مطابق اقوام متحدہ میں فلسطین کے مندوب نے جنرل اسمبلی میں غزہ جنگ بندی کی قرار داد کی منظوری کو تاریخی دن قرار دے دیا۔
فلسطینی سفیر نے پریس کانفرنس میں کہا کہ قرار داد سے بھرپور پیغام گیا ہے، جارحیت کو روکنے تک ایسے اجتماعی فرض کو انجام دیتے رہنا ہوگا۔
فلسطینی مندوب نے قرارداد کی منظوری پر پاکستان کے کردار کو سراہتے ہوئے خراج تحسین پیش کیا۔
اقوام متحدہ میں فلسطینی سفیر نے منیر اکرم کو قرارداد سے متعلق وکالت ادا کرنے پر شکریہ ادا کرتے ہوئے کہا کہ جنرل اسمبلی میں پاکستان نے ہماری بہترین وکالت کی۔
پاکستانی مستقل مندوب منیراکرم گزشتہ رات ہی قطر سے نیویارک پہنچے اور جنرل اسمبلی اجلاس میں بہترین ترجمانی کی۔
