کراچی: وزیر اطلاعات سندھ شرجیل میمن نے کہا کہ جن لوگوں نے بسیں جلائی ہیں ان ہی سے پیسے وصول کریں گے۔
وزیر اطلاعات و ٹرانسپورٹ شرجیل انعام میمن نے سندھ اسمبلی اجلاس میں کہا ہے کہ 9 مئی کو افسوسناک و شرمناک واقعہ ہوا، کراچی میں جن لوگوں نے بسیں جلائی ہیں ان ہی سے پیسے وصول کریں گے۔
انہوں نے کہا کہ بسیں لانا بہت مشکل ہوتا ہے، پی ٹی آئی لیڈروں سے جلی ہوئی بسوں کا پیسہ بھرواؤں گا۔
شرجیل میمن کا کہنا تھا کہ کراچی سمیت سندھ بھر میں غیر قانونی بس اڈے قائم ہیں، غیر قانونی بس اڈوں کے خلاف وقتاً فوقتاً کارروائی ہوتی رہتی ہے۔
خیال رہے کہ پاکستان تحریک انصاف کے سربراہ عمران خان کو گرفتار کرلیا گیا تھا جس کے بعد ملک بھر میں احتجاج اور مظاہروں کا سلسلہ شروع ہوگیا تھا۔
کراچی میں عمران خان کی گرفتاری کیخلاف احتجاج کیا گیا، اس دوران پیپلز بس سروس کی بسوں کو نقصان بھی پہنچایا گیا اور توڑ پھوڑ کی گئی تھی جبکہ ریڈ بس کو بھی آگ لگا دی گئی تھی۔
کراچی کے علاقے نرسری کے قریب مشتعل افراد کی جانب سے پیپلز بس سروس کی بس کو جلا دیا تھا، جس سے پیپلز بس سروس کو کڑوروں روپے کا نقصان اٹھانا پڑا۔
