اسلام آباد: حکومت نے پٹرولیم مصنوعات پر لیوی بڑھا کر عوام کو مکمل ریلیف سے محروم کر دیا۔
تفصیلات کے مطابق ذرائع کا کہنا ہے کہ ہائی اسپیڈ ڈیزل پر پٹرولیم لیوی 5 روپے فی لیٹر بڑھا دی گئی، جس سے لیوی بڑھ کر 45 روپے فی لیٹر ہو گئی ہے۔
ڈیزل پر تیل کمپنیوں کا مارجن بھی 1 روپے 3 پیسے بڑھا دیا گیا۔
ڈیزل کی بنیادی قیمت 230 روپے 82 پیسے ہے، جب کہ عوام کو ڈیزل 280 روپے فی لیٹر میں فروخت کیا جا رہا ہے، ذرائع کے مطابق ڈیزل پر ڈیلرز مارجن 7 روپے، فریٹ مارجن منفی 9 روپے 19 پیسے فی لیٹر ہے۔
ذرائع کے مطابق پٹرول کی بنیادی قیمت 202 روپے 95 پیسے ہے لیکن عوام کو پٹرول 267 روپے فی لیٹر دیا جا رہا ہے، پٹرول پر پٹرولیم لیوی 50 روپے، او ایم سی مارجن 6 روپے فی لیٹر ہے۔
پٹرول پر ڈیلرز مارجن 7 روپے، اور فریٹ مارجن 1 روپے 5 پیسے فی لٹر ہے، پٹرول اور ڈیزل پر سیلز ٹیکس کی شرح صفر ہے۔
