ریاض: نگراں وزیر اعظم انوارالحق کاکڑ نے کہا ہے کہ عالمی برادری سے فوری جنگ بندی کا مطالبہ کرتے ہیں۔
ریاض میں فلسطینی ٹی وی سے گفتگو کرتے ہوئے نگراں وزیر اعظم انوارالحق کاکڑ نے کہا کہ غزہ میں تشدد کے مکمل خاتمے کی فوری ضرورت ہے، غزہ میں انسانی بحران تیزی سے جنم لے رہا ہے۔
نگراں وزیراعظم انوارالحق کاکڑ نے کہا کہ سنجیدہ اقدام چاہتے ہیں جو ہمارے فلسطینی بھائیوں کی مایوسی، تکلیف کو دور کرسکیں، 21 ویں صدی میں غزہ والوں کیساتھ کیا ہورہا ہے، وہ کس تکلیف سے دو چار ہیں۔
وزیراعظم نے مزید کہا کہ عالمی برادری سے فوری جنگ بندی کا مطالبہ کرتے ہیں، غزہ میں فوری تشدد کا خاتمہ ہونا چاہیے اور امداد کیلئے راہداری کھولی جانی چاہیے۔
خیال رہے نگراں وزیراعظم فلسطین کی صورتحال پر آج ہونے والی عرب سربراہی کانفرنس میں شرکت کریں گے اور کل اسلامی تعاون تنظیم کے اجلاس میں شریک ہوں گے۔
