سرگودھا : وزیراعظم شہبازشریف نے سرگودھا میں اپنے ہاتھوں سے عوام میں مفت آٹا تقسیم کیا، ان کا کہنا ہے کہ مہنگائی پر قابو پانے کیلئے مزید اقدامات کررہا ہوں۔
تفصیلات کے مطابق وزیراعظم شہبازشریف نے کمپنی باغ سرگودھا کے علاقے میں قائم مفت آٹا تقسیم مرکز کا دورہ کیا۔ انہوں نے متعلقہ حکام کو سختی سے ہدایات جاری کیں کہ اس کام میں غفلت کا مظاہرہ نہ کیا جائے۔
اس موقع پر انہوں نے آٹا تقسیم کے طریقہ کار کا خود جائزہ لیا، کمشنرسرگودھا نے وزیراعظم کو آٹا تقسیم کے حوالے سے بریفنگ دی، وزیراعظم نے آٹا تقسیم کے طریقہ کار کو مزید بہتربنانے کی ہدایت کی۔
اس کے علاوہ وزیراعظم نے عوام کی آسانی کیلئے آٹا تقسیم کے مراکز بھی بڑھانے کا حکم دیا، انہوں نے اپنے ہاتھوں سے مستحق شہریوں میں آٹا تقسیم کیا انہوں نے کہا کہ10،10کلو کے تین بیگ فی گھرانہ دیئے جارہے ہیں۔
وزیراعظم شہبازشریف نے میڈیا سے گفتگو کرتے ہوئے کہا کہ جو بھی مسائل ہے ان کو حل کرنے کی کوشش کررہے ہیں، آٹے کی مفت تقسیم میں کسی قسم کی کوتاہی برداشت نہیں کی جائے گی۔
ان کا مزید کہنا تھا کہ آٹے کی فراہمی کو خود چیک کررہا ہوں، لمبی لمبی قطاریں ختم کرکے عوام کو وافر مقدار آٹا فراہم کیا جائے۔ مہنگائی پر قابو پانے کیلئے مزید اقدامات کیے جائیں گے۔ ،
مفت آٹا مراکز پر بی آئی ایس پی اور نادرا کاؤنٹرز کو یقینی بنایا جائے، نگراں وزیراعلیٰ اور انتظامیہ کا محنت سے کام کرنے پر شکریہ ادا کرتا ہوں۔
