کراچی : پولیس نے تحریک انصاف کے رکن سندھ اسمبلی راجہ اظہر کی گرفتاری کیلئے چھاپے مارے ، راجہ اظہر کا کہنا ہے کہ بتایا جائے ہمارا جرم کیا ہے؟
تفصیلات کے مطابق تحریک انصاف کے رکن سندھ اسمبلی راجہ اظہر کی گرفتاری کیلئے رات گئے پولیس نے چھاپے مارے۔
پی ٹی آئی ایم پی اے راجہ اظہر نے ویڈیو بیان میں کہا ہے کہ بلدیاتی الیکشن میں پیپلزپارٹی نے پولیس گردی کی انتہا کردی، پولیس گھروں پر چھاپے مار رہی ہے۔
راجہ اظہر کا کہنا تھا کہ بتایا جائے ہمارا جرم کیا ہے، دھاندلی روکنا جرم ہے تو یہ جرم کرتے رہیں گے۔
پی ٹی آئی رکن اسمبلی نے کہا کہ تحریک انصاف کی مقبولیت سے پیپلزپارٹی قیادت خوفزدہ ہے، کراچی نے ثابت کردیا عمران خان کے ساتھ ہے۔
خیال رہے کراچی میں پی ٹی آئی کے رہنماؤں کے خلاف بلدیاتی انتخابات میں پولنگ میٹریل چھیننے اور ہنگامہ آرائی کے الزامات کے تحت مقدمات درج کر لیے گئے ہیں۔
