کراچی : ملک کی موجودہ سیاسی اور معاشی صورتحال پر کراچی چیمبر کے اراکین نے اپنے شدید ردعمل کا اظہار کیا ہے، ان کا کہنا ہے کہ موجودہ حالات کسی طور بھی قابل اطمینان نہیں۔
اس حوالے سے صدر کراچی چیمبر طارق یوسف کا کہنا ہے کہ سیاسی عدم استحکام نے پاکستان کی معاشی بقا کو بھی داؤ پر لگادیا ہے، انہوں نے تمام اسٹیک ہولڈرز پر زور دیا ہے کہ وہ ملک کی خاطر انا پرستی کے بغیر مل بیٹھ کر مسائل کا حل تلاش کریں۔
میڈیا سے گفتگو کرتے ہوئے صدر کراچی چیمبر نے سیاسی عدم استحکام پر مکمل عدم اطمینان کا اظہار کرتے ہوئے کہا کہ ملک کی بیمار معیشت اور مسلسل کم ہوتی برآمدات سے مزید خوفناک اثرات مرتب ہورہے ہیں۔
طارق یوسف نے کہا کہ اس وقت تمام سیاسی جماعتوں سمیت سب کو ایک پیج پر ہونا چاہیے، سیاسی کشیدگی کو کم کیا جائے، بےشمار چیزیں پاکستان اور اس کی تجارت کو خطرے میں ڈال رہی ہیں، کئی برآمد کنندگان معیشت کی بدترین حالت پر تشویش کا اظہار کررہے ہیں۔
سابق صدر کاٹی، سلیم الزمان
اس کے علاوہ کورنگی ایسوسی ایشن آف ٹریڈ اینڈ انڈسٹری کاٹی کے سابق صدر سلیم الزمان معاشی صورتحال پر اظہار تشویش کرتے ہوئے کہا کہ رواں سال10 ماہ کے معاشی اعداد وشمار بہت خراب آئے ہیں۔
انہوں نے کہا کہ ایک سال سے معاشی مشکلات کی باتیں کررہے ہیں ،جو اب سچ ثابت ہوگئیں، ملکی برآمدات مسلسل گھٹ رہی ہے جس سےڈالر کی آمد بھی کم ہوگئی ہے، ڈالر کی قلت کو جواز بناکر درآمدی ریکوری کی گئی۔
سلیم الزمان نے بتایا کہ درآمدی خام مال نہ ملنے سے صنعتی پیداوار شدید متاثر ہوئی ہیں، جس سے ایف بی آر کی ٹیکس وصولی میں نمایاں کمی واقع ہوئی، اس کے علاوہ منی بجٹ نے بھی مزید مشکلات کھڑی کردی ہیں۔
