پشاور: کل سے ممکنہ طور پر بس ریپڈ ٹرانزٹ (بی آر ٹی) بند ہونے جا رہی ہے، اس بندش کو روکنے کے لیے نگراں صوبائی وزیر کی جانب سے تجویز سامنے آ گئی ہے۔
تفصیلات کے مطابق بی آر ٹی کی کل سے ممکنہ بندش کے تناظر میں نگراں صوبائی وزیر ٹرانسپورٹ شاہد خٹک نے حل پیش کر دیا ہے، انھوں نے کہا بی آر ٹی کے مسائل کے حل کے لیے ٹرانس پشاور کو محکمہ ٹرانسپورٹ کے حوالے کیا جائے۔
نگراں صوبائی وزیر شاہد خٹک نے کہا محکمہ ٹرانسپورٹ نے کبھی بھی بی آر ٹی کے معاملات میں مداخلت نہیں کی، بی آر ٹی کمپنیوں کو ادائیگیاں شروع سے محکمہ ٹرانسپورٹ کی بجائے ٹرانس پشاور کر رہی ہے۔
انھوں ںے کہا سابق حکومت نے رولز کے برعکس ٹرانس پشاور کو ایڈیشنل چیف سیکریٹری کے حوالے کیا تھا، بی آر ٹی کے معاملات اب بھی ایڈیشنل چیف سیکریٹری دیکھ رہے ہیں، اے سی ایس ٹرانس پشاور کو محکمہ ٹرانسپورٹ کے حوالے کریں تو کوئی مسئلہ نہیں ہوگا۔
شاہد خٹک کا کہنا تھا کہ محکمہ ٹرانسپورٹ کا کمپنی کے ساتھ صرف ٹرمینل کی لیز کا معمولی مسئلہ ہے جو حل کر لیا جائے گا۔
