کراچی : ’’اس ہاتھ دے اس ہاتھ لے‘‘ یا ’’آج نقد کل ادھار‘‘ کے مصداق پاکستان اسٹیٹ آئل نے پی آئی اے کو نقد رقم کی فوری ادائیگی کے عوض جہازوں کا ایندھن دینے کی شرط عائد کردی۔
پی آئی اے اور پی ایس او حکام کے درمیان ہونے والے اجلاس کی اندرونی کہانی سامنے آگئی جس میں پی ایس او نے پی آئی اے کو فیول کی فراہمی ادائیگی سے مشروط کردی۔
اس حوالے سے ذرائع کا کہنا ہے کہ پی آئی اے نے پی ایس او کو یومیہ 10کروڑ روپے دینے کی یقین دہانی کرادی ہے، روزانہ مذکورہ رقم کی ادائیگی کی صورت میں ہی فیول فراہم کیا جائیگا۔
پی ایس او ذرائع کے مطابق کون سی پروازوں کو فیول فراہم کرنا ہے اس بات سے پی آئی اے خود آگاہ کرے گا، پی آئی اے کے بتانے کے بعد ہی خصوصی پروازوں کیلئے فیول جاری کیا جائے گا۔
ذرائع کا مزید کہنا ہے کہ پاکستان اسٹیٹ آئل اور پی آئی اے کے آج ہونے والے اجلاس کے دوران 10کروڑ روپے آن لائن جمع بھی کرائے گئے ہیں۔
