اسلام آباد : تحریک انصاف نے بلے کے نشان کیلئے سپریم کورٹ سے رجوع کرلیا، جس میں انتخابی نشان سے متعلق پشاور ہائی کورٹ کے فیصلے کیخلاف درخواست پر فوری سماعت کی استدعا کی۔
تفصیلات کے مطابق پاکستان تحریک انصاف نے پشاور ہائیکورٹ کے انتخابی نشان بلے سے متعلق فیصلے کیخلاف سپریم کورٹ میں درخواست دائر کردی۔
درخواست میں مؤقف اختیار کیا کہ پشاورہائیکورٹ کےجج نےقانون کی غلط تشریح کی جس کےباعث ناانصافی ہوئی، 26 دسمبر 2023 کو عارضی ریلیف دیا گیا تھا، عارضی ریلیف سے قبل فریقین کو نوٹس دیا جانا ضروری نہیں۔
درخواست میں کہنا ہے کہ ناقابل تلافی نقصان کے خدشات کے تحت عبوری ریلیف دیا جاتا ہے، پشاور ہائیکورٹ کو بتایا کہ بلے کا نشان نہ ملنے سے ناقابل تلافی نقصان ہو گا۔
پشاور ہائیکورٹ نے عجلت میں فیصلہ دیا، کیس پہلے ہی ڈویژن بینچ کے سامنے مقرر تھا، ڈویژن بینچ سے پہلے سنگل بینچ فیصلہ کرنےکامجازنہیں تھا۔
پی ٹی آئی کی سپریم کورٹ سے اپیل پر فوری سماعت کی استدعا کرتے ہوئے کہا آج یا کل سماعت کی جائے۔
اس موقع پر چیئرمین پی ٹی آئی بیرسٹر گوہر نے میڈیا سے گفتگو کرتے ہوئے کہا کہ سپریم کورٹ چند اہم درخواستوں پر دستخط کرنے آیا ہوں، سپریم کورٹ سے درخواست کریں گے ہمیں سنا جائے۔
بیرسٹر گوہر کا کہنا تھا کہ الیکشن کمیشن نے اپنی درخواست میں لکھا تھا یہ اہم ترین معاملہ ہے،ہماری استدعا ہے اسکروٹنی کا وقت ختم ہو رہا ہے ٹکٹ تقسیم کرنےہیں، کوشش ہے جلد سے جلد یہ کیس لگے،اللہ کرےبلےکانشان ملے۔
