اسلام آباد : بانی پی ٹی آئی نے امریکا سے الیکشن پرمزید سخت موقف اپنانے کا مطالبہ کردیا اور کہا امریکا پاکستان میں انتخابی دھاندلی کیخلاف آواز اٹھائے۔
تفصیلات کے مطابق پاکستان تحریک انصاف کے رہنما بیرسٹرسیف نے میڈیا سے گفتگو کرتے ہوئے کہا کہ بانی پی ٹی آئی نے کہا امریکا کے لیے یہ بہترین موقع ہے وہ اپنے ماضی کو صاف کرے اور پاکستان میں انتخابی دھاندلی کیخلاف آواز اٹھائے ساتھ ہی جو لوگ بھی اس میں ملوث ہیں ان سے کہیں کہ اس کا سدباب کریں۔
خیال رہے گذشتہ روز امریکی محکمہ خارجہ کے ترجمان میتھیو ملر نے پریس بریفنگ کے دوران پاکستان میں انتخابات میں دھاندلی کے الزامات کی تحقیقات کا مطالبہ کیا تھا۔
ان کا کہنا تھا کہ پاکستان میں انتخابات مسابقتی تھے، دنیا بھر میں کہیں بھی ایسے الزامات کی تحقیقات اور حل ہونا چاہیے، ہم ان الزامات کی تحقیقات کا مطالبہ کرتے رہیں گے۔
دوسری جانب ترجمان امریکی نیشنل سیکیورٹی کونسل کے ترجمان جان کربی نے بھی پاکستانی انتخابات میں دھاندلی کے الزامات کی رپورٹس پر اظہار تشویش کرتے ہوئے کہا کہ رپورٹس میں ووٹرز کوڈرانے، دھمکانے اور دبانے کا ذکر ہے۔
جان کربی کا کہنا تھا کہ معاملے کوبہت قریب سے دیکھ رہے ہیں، ووٹ ابھی بھی گنے جارہے ہیں،عالمی مبصرین بھی مشاہدہ کررہے ہیں۔
