گوجرانوالہ : پی ٹی آئی کے رہنما اور سابق ایم پی اے پیرسید سعید الحسن شاہ نے بھی دیگر رہنماؤں کی طرح پی ٹی آئی سے علیحدگی کا اعلان کردیا۔
تفصیلات کے مطابق نو مئی کے واقعہ کے بعد ملک بھر میں اس کی مذمت اور مختلف رہنماؤں کی جانب سے پارٹی چھوڑنے کے اعلانات کا سلسلہ تواتر سے جاری ہے۔
اس حوالے سے گوجرانوالہ سے تعلق رکھنے والے پی ٹی آئی کے ممبر صوبائی اسمبلی پیرسید سعید الحسن شاہ نے تحریک انصاف سے علیحدگی اختیار کرنے کا اعلان کردیا۔
گوجرانوالہ میں پریس کانفرنس سے خطاب کرتے ہوئے انہوں نے کہا کہ جو بات آج کرنا چاہتا ہوں اس کا تعلق ملکی سلامتی اور بقاء سے ہے، میں نے پی ٹی آئی کا ہر محاذ پر بھرپور ساتھ دیا ہے۔
پیرسید سعید الحسن شاہ نے کہا کہ لیکن 9مئی کو جو کچھ ہوا اس سے میری اور حلقے کے عوام کی دل آزاری ہوئی کیونکہ ظفر وال شہداء اور غازیوں کی زمین ہے۔
انہوں نے کہا کہ 9مئی کو شہداء کی یادگاروں اور عسکری اداروں پر حملے کیے گئے، ہم نے ہمیشہ پاک فوج کے افسران اور جوانوں کو عزت و احترام دیا ہے،9مئی کے پرتشدد واقعات کی شدید مذمت کرتے ہیں۔
پیرسید سعید الحسن شاہ کا مزید کہنا تھا کہ میں اور حلقے کے عوام پی ٹی آئی کی سیاست سے لاتعلقی کا اعلان کرتے ہیں، سیاسی جماعتیں اپنی انا سے باہر نکلیں اور ملکی مفاد کا سوچیں۔
