لاہور : پنجاب میں صوبائی اسمبلی کی 20 نشستوں پر ہونے والے ضمنی انتخابات کے سلسلے میں کسی بھی ناخوشگوار واقعے سے نمٹنے کیلئے پولیس نے حکمت عملی مرتب کرلی۔
اس حوالے سے اہم اقدامات کیے گئے ہیں، ذرائع کا کہنا ہے کہ آئی جی پنجاب کی ہدایت پر ضمنی انتخابات کے انعقاد کے لیے مختلف مقامات پر پولیس کی ٹیمیں تعینات کی گئی ہیں۔
ذرائع کے مطابق 3100 سے زائد پولنگ اسٹیشنز پر مرد و خواتین پولیس اہلکار تعینات ہیں،20صوبائی حلقوں میں 52 ہزار سے زائد پولیس اہلکاران و افسران تعینات کیے گئے ہیں۔
ترجمان پنجاب پولیس نے میڈیا کو بتایا ہے کہ کیٹیگری اے میں 676 ، بی میں 1197 اور سی میں 1258پولنگ اسٹیشن شامل ہیں جبکہ خواتین کے پولنگ بوتھوں پر خواتین اہلکار تعینات ہیں۔
ترجمان کے مطابق آئی جی پنجاب سنٹرل پولیس آفس میں صورتحال کی نگرانی کریں گے، الیکشن کمیشن کے ضابطہ اخلاق پر من و عن عمل درآمد یقینی بنایا جائے گا۔
ترجمان پنجاب پولیس کا کہنا ہے کہ کسی جگہ پولنگ کا عمل متاثر نہیں ہونے دیا جائے گا، اسلحے کی نمائش ، ہوائی فائرنگ، جھگڑے، کیمپ اکھاڑنے اور لاؤڈ اسپیکر کے استعمال پر پابندی ہے۔
انہوں نے کہا کہ ہر قسم کی خلاف ورزی پر زیرو ٹالرینس ہوگا، سیاسی جماعتوں کے 1100 سے زائد کارکنان و امیدواران سے ضمانت نامے لے لیے۔
