لاہور: پنجاب انسداد پولیو پروگرام کے سربراہ خضر افضال نے کہا ہے کہ پنجاب کو ہجرت کرنے والی آبادیوں سے پولیو کا خطرہ لاحق ہے۔
تفصیلات کے مطابق اتوار کو ملک کے تین صوبوں اور اسلام آباد کے سیمپل ٹیسٹوں پر مشتمل پولیو پازیٹو سیوریج سیمپلز کی ٹیکنیکل رپورٹ وزارت صحت کو موصول ہوئی تھی، سیمپلز میں پولیو وائرس کی موجودگی کی تصدیق کی گئی تھی، اس کے بعد گزشتہ روز ہفتے سے قومی انسداد پولیو مہم کا آغاز کیا گیا تھا، جس کا آج دوسرا روز ہے۔
پنجاب انسداد پولیو پروگرام کے سربراہ ڈاکٹر خضر افضال نے پولیو مہم کے حوالے سے گفتگو کرتے ہوئے کہا کہ پہلے روز 62 لاکھ سے زائد بچوں کو قطرے پلائے گئے ہیں۔ انھوں نے کہا پنجاب اکتوبر 2020 سے پولیو سے پاک ہے، لیکن اسے ہجرت کرنے والی آبادیوں سے پولیو کا خطرہ لاحق ہے۔
اسلام آباد اور 3 صوبوں کی سیوریج میں پولیو وائرس کی تصدیق، پولیو نے پھر پنجے گاڑ لیے
ڈاکٹر خضر نے بتایا کہ لاہور، راولپنڈی، فیصل آباد میں مہم 14 جنوری تک جاری رہے گی، صوبے کے داخلی اور خارجی راستوں پر آنے والوں کو قطرے پلائے جا رہے ہیں، اور پولیو ورکر انتہائی مستعدی سے اپنی ڈیوٹی انجام دے رہے ہیں۔
