پی سی بی کے سابق چیئرمین رمیز راجہ نے کپتان بابر اعظم سے ہونے والی ملاقات کا احوال بتادیا۔
پاکستان کے آل فارمیٹ کے کپتان بابر اعظم مبینہ طور پر وائٹ بال کرکٹ میں کپتانی سے دستبردار ہونے پر غور کر رہے ہیں۔
رپورٹ کے مطابق گزشتہ روز قومی ٹیم کے کپتان بابر اعظم نے اس حوالے سے ایڈن گارڈنز کولکتا میں سابق چیئرمین پی سی بی رمیز راجا سے ملاقات کی، اس دوران کپتان نے اپنی کپتانی سے متعلق ان سے مشاورت کی۔
اس مشاورت کے بعد پاکستان کرکٹ بورڈ (پی سی بی) کے سابق چیئرمین رمیز راجہ نے نے نجی چینل میں گفتگو کرتے ہوئے بابر اعظم سے ملاقات کا احوال بتایا۔
رمیز راجہ نے کہا کہ کھیل میں ہار جیت ہوتی ہے، لیکن اس کا مطلب یہ نہیں کہ کرکٹرز پر ہر طرف سے تنقید کی جائے، اگر کرکٹرز کی عزت نہیں ہوگی تو وہ کس طرح آگے بڑھیں گے۔
ان کا کہنا تھا کہ میں مانتا ہوں کھلاڑیوں نے ورلڈ کپ میں بہت سی غلطیاں کی ہیں لیکن ہماری قوم کے مزاج میں بہت تلخی ہے اور ہمارے پلئیرز اس تلخی کو محسوس کرتے ہیں۔
رمیز راجا کا کہنا تھا کہ سیمی فائنل میں کوالیفائی نہ کرنے پر بابر اعظم بہت افسردہ لگ رہے تھے اور مجھے یہ بہت برا لگا، ان کی کپتانی کے حوالے سے گفتگو نجی تھی اور میں اسے عام نہیں کرنا چاہتا۔
واضح رہے کہ پاکستان کرکٹ ٹیم کی رواں ورلڈکپ میں کارکردگی مایوس کن رہی، ٹیم کو بھارت، آسٹریلیا، جنوبی افریقا اور افغانستان سے شکست کا سامنا کرنا پڑا ہے، پاکستان کرکٹ ٹیم کے سیمی فائنل میں پہنچنے کے امکانات بھی نہ ہونے کے برابر ہیں۔
