کراچی (رپورٹ : روبینہ علوی) شہر قائد کے رہائشی نے نادر و نایاب نوادرات کو جمع کرنے کے شوق میں جنون کی حد تک محنت کی اور کئی سال سے آثار قدیمہ کی تاریخی اشیاء جمع کررہے ہیں۔
پاکستان چوک کے علاقے میں رہائش پذیر احمد انور نے قدیم اشیاء جمع کرکے اپنے گھر میں اب اپنا میوزیم قائم کرلیا ہے۔
اے آر وائی نیوز کی نمائندہ روبینہ علوی نے ان سے ملاقات کی اور ان کے اس شوق کی تکمیل سے متعلق تفصیلی گفتگو کی۔
احمد انور نے بتایا کہ میں بنیادی طور پر فائن آرٹسٹ ہوں، اس طرح کی قدیمی چیزوں کو جمع کرنا میرا شوق ہے، ایک پرانا کیمنرہ دکھاتے ہوئے انہوں نے بتایا کہ یہ کیمرہ میرے والد انڈیا سے لے کر آئے تھے۔
احمد انور نے ایک پرانی لالٹین دکھاتے ہوئے بتایا کہ یہ وہ لالٹین ہے جو محکمہ ریلوے میں استعمال کی جاتی تھی۔
احمد انور کے اس چھوٹے سے میوزیم میں گیگر اشیاء بھی موجود ہیں جو انہوں نے مختلف اوقات میں مختلف ذرائع سے حاصل کیں۔
