اسلام آباد: چیئرمین ایکسچینج کمپنیز ایسوسی ایشن آف پاکستان ملک بوستان نے کہا ہےکہ ہم حکومت کو اگلے دو سال کیلئے ماہانہ 1 ارب ڈالر دے سکتے ہیں۔
سینیٹ کی قائمہ کمیٹی برائے خزانہ کا اجلاس ہوا، اجلسان کی صدرات سلیم مانڈوی والا نے جہاں چیئرمین ایکسچینج کمپنیز ایسوسی ایشن آف پاکستان ملک بوستان نے بریفنگ دیتے ہوئے کہا کہ ہم دو سال کیلئے 1 ارب ڈالر دینے کو تیار ہیں، پھر پاکستان کو آئی ایم ایف کی ضرورت نہیں رہے گی، آئی ایم ایف کے مطالبات بڑھتے ہی جارہے ہیں، آئی ایم ایف پاکستان کو ذلیل و خوار کررہا ہے۔
ملک بوستان کا کہنا تھا کہ گزشتہ 30 سال میں پاکستان سے 180 ارب ڈالر بیرون ملک جا چکے ہیں، پاکستان میں فارن ایکسچینج کی کمی نہیں ہے لیکن مارکیٹ کبھی ڈنڈے سے قابو نہیں آتی ہے۔
ملک بوستان کا کہنا تھا کہ ہمیں فری ہینڈ دینے کی ضرورت ہے، کرپٹو کرنسی اور فارن فاریکس ٹریڈ میں پیسہ ضائع ہورہا ہے، دنیا میں کہیں بھی ٹرانزیکشن کی ویڈیو ریکارڈنگ نہیں ہوتی ہم کرتے ہیں۔
انہوں نے کہا کہ ہندی حوالہ کا لائسنس دبئی اور برطانیہ میں دیا گیا ہے، حکومت سے درخواست ہے ہمیں بھی حوالہ ہنڈی کا لائسنس جاری کیا جائے۔
چیئرمین ایکسچینج کمپنیز ایسوسی ایشن آف پاکستان ملک بوستان نے مزید کہا کہ 15 ہزار ڈالر تک صارفین سے شناختی کارڈ نہ مانگنے کی اجازت دی جائے، جو پاکستان ڈالر یا ریال لیکر آتا ہے ان سے رسید نہ مانگی جائے۔
