فرانسیسی فٹبالر کریم بینزیما نے لیجنڈ فٹ بالر زین الدین زیڈان کے بعد سال کے بہترین فٹبالر کا ایوارڈ اپنے نام کر لیا ہے۔
تفصیلات کے مطابق کریم بینزیما سال کے بہترین کھلاڑی کا ایوارڈ ’بیلن ڈی اور 2022‘ جیت گئے، وہ زین الدین زیڈان کے بعد پہلے کھلاڑی ہیں جنھوں نے یہ ایوارڈ اپنے نام کیا۔
یہ ایوارڈ جیتنے والے کریم بینزیما فرانسیسی فٹ بال ٹیم کے پانچویں کھلاڑی ہیں، 1998 میں زین الدین زیڈان نے فرانس کی جانب سے اس ایوارڈ کو اپنے نام کیا تھا۔
Karim Benzema is the fifth French player to win the Ballon d'Or and the first since Zinedine Zidane, his former coach at Real Madrid 🇫🇷 pic.twitter.com/6r10p8Kx8U
— ESPN+ (@ESPNPlus) October 17, 2022
کریم بینزیما نے گزشتہ سیزن 44 گولز کیے، ساتھ ہی انہوں نے ریال میڈرڈ کو چیمپینز لیگ اور لالیگا جتوانے میں اہم کردار ادا کیا۔
واضح رہے کہ بیلن ڈی اور ایوارڈ فرانس فٹ بال کی جانب سے سال کے بہترین فٹبالر کو دیا جاتا ہے جب کہ اس میں دنیا بھر سے 180 صحافی فاتح کیلئے ووٹ کرتے ہیں، گزشتہ سال یہ ایوارڈ لیونل میسی نے ریکارڈ 7ویں بار اپنے نام کیا تھا۔
فرانسیسی فٹبال حکام نے سال کے بہترین کھلاڑی کے ایوارڈ کیلئے 30 کھلاڑیوں پر مشتمل نامزد کھلاڑیوں کا اعلان کیا تھا، جس میں 2005 کے بعد پہلی بار لیونل میسی کا نام شامل نہیں تھا۔
اس سال سب سے زیادہ 7 بار بیلن ڈی اور ایوارڈ جیتنے والے لیونل میسی نے گزشتہ سیزن میں پیرس سینٹ جرمین کی نمائندگی کی۔جہاں وہ 34 میچز میں صرف11 گول کر سکے تھے۔ میسی کی خراب کارکردگی کی وجہ سے وہ سال کے بہترین کھلاڑی کے ایوارڈ کی نامزدگیوں میں جگہ نہیں بنا سکے۔
برازیل کے اسٹار فٹبالر نیمار بھی اس فہرست میں اس بار جگہ نہیں بنا سکے ہیں جب کہ پرتگال کے اسٹار کھلاڑی کرسٹیانو رونالڈو نے مانچسٹر یونائیٹڈ کیلئے 31 میچز میں 18 گول کیے۔
میسی سب سے زیادہ 7 مرتبہ ’بیلن ڈی اور‘ ایوارڈ جیت چکے ہیں جبکہ رونالڈو نے یہ ایوارڈ 5 بار اپنے نام کیا ہوا ہے۔
