رائس ایکسپورٹرز ایسوسی ایشن آف پاکستان کے چیئرمین چیلارام کیلوانی نے بتایا ہے کہ پاکستان میں رواں سال چاول کی5 ملین ٹن چاول کی فصل ہوگی اور3بلین ڈالر تک کا چاول پاکستان سے ایکسپورٹ کیا جاسکے گا۔
کراچی میں پریس کانفرنس سے خطاب کرتے ہوئے چیلارام کیلوانی نے کہا کہ میکسیکو کی جانب سے پاکستانی چاول پر عائد پابندی ہٹادی گئی ہے جبکہ روس نے بھی پاکستانی چاول پر سے پابندی ختم کردی ہے۔
ان کا کہنا تھا کہ اس کے علاوہ انڈونیشیا نے بھی پاکستان سے 90 ہزار ٹن چاول خریدنے کی خواہش ظاہر کی ہے اور مزید 2 لاکھ ٹن چاول خریدے گا، فلپائن بھی پاکستان سے چاول کی ڈیمانڈ ہے۔
انہوں نے بتایا کہ انڈیا پر پابندی کی وجہ سے پاکستانی چاول کی ڈیمانڈ بڑھ گئی ہے ،ہم انڈیا کے مقابلے میں100 ڈالر زائد قیمت پر چاول فروخت کررہے ہیں۔
چیئرمین ریپ نے کہا کہ کریک ڈاون کی وجہ سے ڈالر نیچے آیا ہے جبکہ چینی اور دیگر چیزوں کے ذخیرہ اندوزی کے خلاف آپریشن سے بھی ریٹ نیچے آیا ہے۔
چیلارام نے چاول کے ایکسپورٹرز کی جانب سے انڈرانوائسنگ اور منی لانڈرنگ کے سوال پر کہا کہ چاول کے ایکسپورٹرز نہ تو حوالہ ہنڈی کرتے ہیں اور نہ ہی انڈر انوائسنگ کرتے ہیں۔
رائس ایکسپورٹرز انڈر انوائسنگ کی تحقیقات کے لئے تیار ہیں اور اگر حکومت کی کسی بھی ایجنسی کو رائس ایکسپورٹرز پر شک ہوتو ہم انکوائری کیلئے موجود ہیں، ہم ایف آئی اے اور نیب کا سامنا کریں گے۔
محمود مولوی نے کہا کہ اگر حکومت چاول کے ایکسپورٹرز پر منی لانڈرنگ ثابت کرے تو ہمیں انکوائری کا سامنا کرنے میں کوئی اعتراض نہیں ہے۔
محمود مولوی نے کہا کہ اس سیزن کا پہلا چاول 550ڈالر پر جارہا ہے اور یہ کم سے کم پرائس ہے،حکومت مثبت اقدامات اٹھارہی ہے۔ اور30جون2024تک ہم چاول کی برآمدات3ارب ڈالر تک لے جائیں گے۔
سابق چیئرمین رفیق سلیمان نے کہا کہ میکسیکو کو 650سے700ڈالر تک فروخت کرسکیں گے۔ ہم نے وزارت تجارت ہماری تجاویز پر عمل کرے تو ہم چاول کی ایکسپورٹ5ارب ڈالر تک لے جاسکتے ہیں۔
