فیصل آباد : پنجاب میں ڈاکو بے خوف وارداتیں جاری رکھے ہوئے ہیں، شوہر کے ساتھ جانے والی خاتون ڈاکوؤں کی فائرنگ کا نشانہ بن کرجان سے ہاتھ دھو بیٹھی۔
تفصیلات کے مطابق فیصل آباد کے علاقے چک 479میں موٹروے پل کے قریب موٹرسائیکل نہ روکنے پر ڈاکوؤں نے فائرنگ کردی، گولی لگنے سے موٹر سائیکل پر بیٹھی خاتون موقع پر ہی ہلاک ہوگئی۔
ریسکیوذرائع کا کہنا ہے کہ 35سالہ خاتون اپنے شوہرکے ساتھ موٹرسائیکل پرجارہی تھی جسے ڈاکوؤں نے روکنے کی کوشش کی تو شوہر نے موٹر سائیکل کی رفتار تیز کردی تھی۔
بعد ازاں مقتولہ کے لواحقین نے احتجاجاً لاش سمندری لاہور موٹر وے پر رکھ کر شاہراہ مکمل بند کردی، مظاہرین نے ٹائر جلا کر موٹروے دونوں طرف سے بند کر دیا، پولیس کےخلاف نعرے بازی کرتے ہوئے ڈاکوؤں کی فوری گرفتاری کا مطالبہ کیا۔
مظاہرے کے باعث شاہراہ کے دونوں اطراف گاڑیوں کی قطاریں لگ گئیں، بعد ازاں علاقہ پولیس نے آکر مظاہرین کو ملزمان کی گرفتاری کی یقین دہانی کروائی۔
