ماسکو : روسی ویزا حاصل کرنے کے خواہشمند سیاحوں میں تیزی سے اضافہ ہوا جن میں بڑی تعداد ان غیرملکیوں کی ہے جن کا تعلق یورپی ممالک سے ہے۔
اس حوالے سے روسی وزارت خارجہ کے قونصلر ڈپارٹمنٹ کے سربراہ الیکسی کلیموف نے بتایا ہے کہ روس پر پابندیوں اور یوکرین کے تنازع پر ماسکو اور برسلز کے درمیان کشیدہ تعلقات کے باوجود اس سال روس نے یورپی یونین کے شہریوں کی جانب سے سیاحتی ویزا کی درخواستوں میں اضافہ دیکھا ہے۔
کلیموف کے مطابق ماسکو نے 2022 کی اسی مدت کے مقابلے میں رواں سال کے پہلے نو مہینوں میں یورپی سیاحوں کو 57 فیصد زیادہ سیاحتی ویزے جاری کیے ہیں۔
کلیموف نے کہا کہ یکم جنوری سے 30 ستمبر 2023 تک روسی وزارت خارجہ کے غیر ملکی مشنوں نے یورپی ممالک میں تمام زمروں کے 225,000 ویزے جاری کیے، جن میں 141,000 سیاحتی ویزے بھی شامل ہیں۔
انہوں نے کہا کہ حال ہی میں بالٹک ریاستوں سے ویزا درخواستوں میں نمایاں اضافہ ہوا ہے۔ لتھوانیائی باشندوں کو جاری کیے گئے ویزوں کی تعداد میں % 75اضافہ ہوا اور اگست اور ستمبر میں اسٹونین کے لیے پچھلے دو مہینوں کے مقابلے میں تین گنا سے بھی زیادہ اضافہ ہوا۔
کلیموف نے مزید کہ یورپی شہریوں کو جاری کیے جانے والے روسی ویزوں کی کل تعداد جن میں سفارتی، کام، طالب علم اور دیگر قسم کے ویزے شامل ہیں، جنوری سے ستمبر میں 10 فیصد کم ہوئے۔
اس کے علاوہ اس سال کے اعداد و شمار ابھی بھی یوکرین میں تنازعہ سے پہلے رجسٹرڈ ہونے والوں سے بہت پیچھے ہیں۔
مثال کے طور پر 2019 کے پہلے نو مہینوں میں روس نے یورپی یونین کے شہریوں کو 1.6 ملین ویزے جاری کیے، جن میں 1.1 ملین سیاحتی ویزے بھی شامل ہیں۔
