کراچی : پاکستان شوبز انڈسٹری کی معروف اداکارہ سعدیہ امام نے کہا ہے کہ ہماری امی نے ہمیں بات کرنے سے لے کر اٹھنے بیٹھنے اور رکھ رکھاؤ تک کا سلیقہ سکھایا اور یہ کہ کس سے کس طرح کیا بات کرنی چاہیے۔
اے آر وائی ڈیجیٹل کے پروگرام گڈ مارننگ پاکستان میں میزبان ندا یاسر کی جانب سے پوچھے گئے ایک سوال میں کہ آپ کے گھر میں سلیقے کی کیا تعریف ہے؟
اس کے جواب میں اداکارہ سعدیہ امام نے بہت تفصیلی اور مدلل جواب دیتے ہوئے بتایا کہ ہم بہنوں کی اچھی تعلیم و تربیت میں ہماری والدہ کا بہت اہم کردار ہے۔
انہوں نے بتایا کہ ہماری امی کہتی تھیں کہ بڑوں سامنے ٹانگ پہ ٹانگ رکھ کر نہ بیٹھو، اگر میاں بیوی بھی ہیں تو بڑوں کے سامنے ساتھ جڑ کر نہیں بیٹھیں گے، کسی کو دعوت پر بلانا ہو تو گھر کے سربراہ کو دعوت دیں۔ یہ تمام باتیں رکھ رکھاؤ اور سلیقے میں ہی شمار کی جاتی ہیں۔
انہوں نے بتایا کہ ہماری امی گھر میں ہفتہ وار صفائی کرواتی تھیں اور گھر کا ہر فرد اس میں شامل ہوتا تھا وہ کہتی تھیں کہ جب تک تم خود صفائی نہیں کروگی تو تم کو کیسے معلوم ہوگا کہ کون سی چیز کہاں رکھی ہے؟