پاکستان کے علاوہ کہیں اور زیادہ دیر نہیں رہ سکتی، سارہ لورین

کراچی : پاکستان شوبز انڈسٹری کی معروف اداکارہ سارہ لورین کا کہنا ہے کہ میرا گھر دبئی میں ضرور ہے لیکن میں پاکستان کے علاوہ کہیں اور زیادہ دیر نہیں رہ سکتی۔

اے آر وائی ڈیجیٹل کے پروگرام گڈ مارننگ پاکستان میں جشن آزادی اسپیشل شو میں اداکارہ سارہ لورین نے شرکت کی اور پاکستان سے اپنی بے پناہ محبت کا اظہار کیا۔

ان کا کہنا تھا کہ دنیا میں ہم کہیں بھی جائیں بحیثیت فنکار ہماری پہنچان پاکستان ہے اور وہاں ملنے والے لوگ بھی بے حد محبت اور اپنائیت کا اظہار کرتے ہیں اسی لیے بیرون ملک رہتے ہوئے میں اپنا وطن بہت مس کرتی ہوں۔

انہوں نے کہا کہ اپنے وطن کی ثقافت اور اس کی پہچان کو سنبھال کر رکھنا بحیثیت پاکستانی ہم سب کا فرض ہے کیونکہ پاکستان ہے تو ہم ہیں۔

Comments