سابق وزیر اعظم آزاد کشمیر سردار تنویر الیاس کا کہنا ہے کہ عوام کی رہنما چوہدری شجاعت کے علاوہ کوئی نہیں کر سکتا۔
لاہور میں چوہدری شجاعت سے ملاقات کے بعد میڈیا سے گفتگو کرتے ہوئے تنویر الیاس نے کہا کہ پورے پاکستان کا دل لاہور کے ساتھ دھڑکتا ہے، چوہدری شجاعت کے ساتھ تعلق بہت پرانا ہے، کوئی بھی رہنمائی چاہیے ہوتی ہے تو ان سے لیتے ہیں۔
تنویر الیاس نے کہا کہ سیاسی لوگوں میں اگر کوئی رہنمائی کر سکتا ہے تو وہ چوہدری شجاعت ہیں، ہم نے جو رواداری سیکھی ہے وہ ان ہی سے سیکھی ہے۔
انہوں نے کہا کہ ملک سیاسی طور پر گرداب میں ہے جس میں پی ٹی آئی کا اہم کردار ہے، ہم ایک مکمل ایجنڈا رکھتے ہیں، ہم دوسری قیادت کے ساتھ بھی مل رہے ہیں۔
صحافی کے سوال کا جواب دیتے ہوئے تنویر الیاس نے کہا کہ میں نے یہ نہیں کہا کہ مسلم لیگ (ق) میں شامل ہو رہا ہوں بلکہ میں نے کہا کہ چوہدری شجاعت کی مشاورت سے اس کا فیصلے کروں گا، سب سے زیادہ صوبائی ممبران میرے پیچھے کھڑے ہیں۔
اس موقع پر سابق گورنر پنجاب چوہدری سرور نے میڈیا سے گفتگو میں کہا کہ تنویر الیاس نے کہا کہ میں چوہدری شجاعت کے حکم کی تعمیل کروں گا، ہماری کوئی بھی برانچ آزاد کشمیر میں نہیں ہے، چوہدری شجاعت نے ہدایت کی ہے کہ اپنی پوری ٹیم لے کر آئیں۔
