ریاض: سعودی وزیر خارجہ شہزادہ فیصل بن فرحان نے تشویش کا اظہار کیا ہے کہ ایران اگر جوہری ہتھیار حاصل کر لیتا ہے، تو اس سے خطہ ایک غیر یقینی صورت حال کا شکار ہو جائے گا۔
عرب نیوز کے مطابق سعودی عرب کے وزیر خارجہ نے اتوار کے روز کہا کہ اگر ایران ایک آپریشنل جوہری ہتھیار حاصل کر لیتا ہے تو خطے میں غیر یقینی صورت حال پیدا ہو جائے گی۔
شہزادہ فیصل بن فرحان نے ابوظبی میں عالمی پالیسی کانفرنس میں ایک آن اسٹیج انٹرویو میں کہا کہ ہم خطے میں ایک انتہائی خطرناک مقام پر ہیں، آپ توقع کر سکتے ہیں کہ علاقائی ریاستیں یقینی طور پر اس امر کو مدِ نظر رکھیں گی کہ وہ اپنی سلامتی کو کیسے یقینی بنا سکتے ہیں۔
انھوں نے کہا ایران کے ساتھ ایٹمی معاہدے کی ناکامی پورے خطے کو نازک دور میں پہنچا دے گی۔
جمعہ کو ہونے والی جی سی سی-چین سمٹ اور عرب-چین سربراہی اجلاس کے بارے میں بات کرتے ہوئے شہزادہ فیصل نے کہا کہ مملکت اور چین کے درمیان تعاون کو بڑھانا ’ناقابل یقین حد تک اہم‘ ہے۔
انھوں نے کہا کہ چین نہ صرف سعودی عرب بلکہ تقریباً تمام عرب دنیا کے لیے اہم تجارتی پارٹنر ہے، اور دنیا کی دوسری سب سے بڑی معیشت کے ساتھ اس بات چیت کا ہونا ہمارے لیے انتہائی اہم ہے۔
شہزادہ فیصل بن فرحان نے مزید کہا کہ تیل کے موجودہ نرخ منصفانہ ہونے کے ساتھ ساتھ مستحکم بھی ہیں، تیل پیدا کرنے اور خریدنے والے دونوں فریقوں کے لیے ان کا منصفانہ ہونا ضروری ہے اور ہم نے امریکا کے سامنے یہ نکتہ واضح کر دیا ہے۔
